júní 2009

Í fyrsta skipti í Reykjavík : Stóri músíkdagurinn, sunnudaginn 21. júní 2009. "Stóri músíkdagurinn" verður haldinn í fyrsta skipti í Reykjavík þann 21. júní n.k. Á dagskránni eru fjölmargir tónleikar í miðbænum eftir hádegið og frá kl. 21 um kvöldið verða tónleikar á Café Rósenberg (Klapparstíg 25-27). Frá kl. 13 til 16 stíga áhugamenn og atvinnumenn á stokk og spila af hjartans lyst á Austurvelli og Ingólfstorgi. Það eru allir velkomnir að taka þátt og deila ánægju sinni á tónlist, hver sem tónlistartegundin er (jazz, rokk, klassík, þjóðlagatónlist…). Rás 2 verður á staðnum og sendir út beint. Ef þig langar að vera með, hafðu samband við Alliance Française sem fyrst, með tölvupósti alliance@af.is eða í síma 552 3870. Um kvöldið eru svo allir velkomnir á Café Rósenberg frá kl. 21 að hlusta á tónleikana "Gainsbourg á íslenska vísu"! Þar ætla nokkrir ungir og hæfileikaríkir íslenskir tónlistarmenn að leika eigin tónlist og einnig nýja útfærslu á einu lagi að eigin vali eftir Serge Gainsbourg. Fram koma: Retro Stefson, Hraun, Sprengjuhöllin, Ólöf Arnalds o.fl. Rás 2 sendir tónleikana út beint. Það eru Alliance Française í Reykjavík, Franska sendiráðið, Höfuðborgarstofa, Rás 2 og Grapevine sem standa að Stóra músíkdeginum. Ef þið misstuð af tónleikunum “Gainsbourg á íslenska vísu”, sem Alliance Française og Franska sendiráðið stóðu fyrir á Kaffi Rosenberg sunnudaginn 21. júní eða ef ykkur langar einfaldlega til að hlusta á hann aftur, smellið þá á hlekkinn hér fyrir neðan: http://dagskra.ruv.is/ras2/4469924/2009/06/21/

Að velja rétta grillvínið Dominique Plédel í Alliance Française þriðjudaginn 9. júní kl. 20:00 Að grilla hefur verið þjóðaríþrótt Íslendinga á sumrin og hver hefur sína skoðun á því hvaða vín hentar best með því. En það er líka ágætt að skoða eitthvað annað en það sem maður er vanur að hafa: humar, fiskur, kjúklingur, lambakjötið - kryddið eða maríneringin, meðlætið, allt hefur sitt að segja til að úr verði góð máltíð og þar hefur vínið ekki síst sitt hlutverk. Alliance Française og Dominique Plédel, skólastjóri Vínskólans í Reykjavík, http://www.vinskolinn.is/um_vinskolann/, efna til námskeiðs þar sem gefin verða góð ráð til að velja gæðavín á viðráðanlegu verði. Dagskráin fer fram á íslensku og frönsku. Verð: 2.900 kr. fyrir félagsmenn, 3.500 kr. fyrir aðra. Skráning hjá Alliance Française í Reykjavík, Tryggvagötu 8, 101 Reykjavík, á staðnum eða með því að senda tölvupóst á alliance@af.is eða í síma 552 3870. Hægt er að greiða með millifærslu á bankareikning okkar um leið og pantað er eða áður en dagskráin hefst. Banki: 0137-26-000378, kt: 420169-1839.

Aðalfundur Alliance française 2009 Aðalfundur Alliance française verður haldinn fimmtudaginn 4. júni kl. 20:00 í húsakynnum félagsins í Tryggvagötu 8. Fundarefni: - Ársskýrsla forseta - Samþykkt ársreikninga - Kosning stjórnar - Önnur mál Rétt til fundarsetu hafa allir skuldlausir meðlimir Alliance française. Stjórn Alliance française endurkosin Aðalfundur Alliance française, sá 98. í sögu félagsins, var haldinn í húsakynnum félagsins, Tryggvagötu 8 í Reykjavík, fimmtudaginn 4. júní. Á fundinum gerði forseti grein fyrir starfsemi félagsins frá maí 2008 til maí 2009, ársreikningar lagðir fram til samþykktar og félaginu kosin stjórn. Stjórnin var endurkosin, Friðrik Rafnsson var endurkosinn forseti og aðrir stjórnarmenn eru þau Bruno Lebas, Eve Leplat, Guðlaug Matthildur Jakobsdóttir, Guðjón Ármann Eyjólfsson, Marlène Pernier, Philippe Blanc og Sigríður Snævarr. Þrátt fyrir efnahagsþrengingar hérlendis var starfsemi Alliance française blómleg á síðasta starfsári, félagið skipulagði á annan tug viðburða eitt sér eða í samstarfi við ýmsa aðila, ss, kvikmyndahátíð, fyrirlestra, menningarnámskeið og fleiri viðburði sem voru afar vel sóttir. Ennfremur var frönskukennslan blómleg og vel sótt, bæði af börnum og fullorðnum. Framundan eru ýmsar nýjungarí starfsemi félagsins og verða þær kynntar síðar. Með kærri kveðju, Friðrik Rafnsson forseti Alliance française

maí 2009

"Sælkeragöngur um París", 19. maí kl. 20.00 Nú eru mæðgurnar Sigríður Gunnarsdóttir og Silja Sallé aftur komnar á stjá, en fyrri bók þeirra, Sælkeraferð um Frakkland, hefur notið mikilla vinsælda. Að þessu sinni leiða þær okkur um 20 hverfi Parísarborgar í girnilegri bók sem kallastSælkeragöngur um París – 60 uppskriftir að hamingjunni á Parísarvísu. Þar lifnar heimsborgin við í máli, myndum og mataruppskriftum. Í tilefni af útgáfu bókarinnar bjóðum við til kynningarkvölds, þriðjudaginn 19. maí kl. 20.00, í Alliance Française, Tryggvagötu 8. Þær mæðgur segja frá París, mat og hamingjunni, sýna ljósmyndir og bjóða upp á veitingar í anda bókarinnar.

Árshátíð Alliance Française í Reykjavík, 15. maí kl. 19.30 Kæru vinir, Árshátíð Alliance Française verður haldin föstudaginn 15. maí 2009 kl. 19.30 að Tryggvagötu 8. Á dagskránni er fransk-íslenskt vorhlaðborð, frönsk vín og franskur söngur, allt til að við getum átt saman ánægjulega kvöldstund í franskri stemmningu. Tilkynnið þátttöku ykkar fyrir 13. maí með því að senda tölvupóst á alliance@af.is eða með því að hringja í okkur í síma 552 3870 frá kl. 14-18. Verð á mann: Félagar Alliance Française og nemendur: 2.200 kr Aðrir: 2.900 kr. ½ vínflaska innifalin. Viðbótarvínflaska kostar 1.800 kr. Greiðist um leið og pantað er, eða í síðasta lagi 13. maí á bankareikning Alliance Française nr. 0137-26-378; kt. 420169-1839. Með stuðningi franska sendiráðsins sem við þökkum kærlega fyrir. Sjáumst mjög fljótlega!

mars 2009

Bókmenntakvöld, þriðjudaginn 31. mars: Friðrik Rafnsson: Kundera er ekki fiskur - rabb um nýjustu bók Milans Kundera Þriðjudaginn 31. mars kl. 20:00 verður Friðrik Rafnsson, bókmenntafræðingur og þýðandi, með rabb í Alliance francaise um nýjustu bók skáldsagna- og ritgerðahöfundarins Milan Kundera, “Une Rencontre”. Bókin kom út í París fimmtudaginn 26. mars og hefur þegar hlotið gríðarlegt lof gangrýnenda í Frakklandi og þykir mikill menningarviðburður þar. Hér er um að ræða greinasafn í níu hlutum þar sem Kundera fjallar af því listilegu og skarpa innsæi sem hann er þekktur fyrir um skáldsagnahöfunda, tónskáld og listmálara sem mestu máli skipta fyrir hann. Höfundurinn leiðir lesandann í gegnum skáldsögur allt frá 16. öldinni (Rabelais) til nútímans (Malaparte, Fuentes, Guðbergur Bergsson, Garcia Marquez), fjallar um arfleifð tónskálda á borð við Beethoven, Schönberg, Xenakis og Janacek og veltir fyrir sér fagurfræði listmálara eins og Francis Bacon og Ernest Breleur. Bókin er stórmerkilegt ferðalag um menningu Evrópu frá 16. öld til nútímans (raunar með viðkomu á eyjunni Martinique í Karíbahafinu) í aðgengilegri og persónulegri leiðsögn eins merkasta og vinsælasta rithöfundar samtímans. Bókin er nýkomin út hjá virtustu bókaútgáfu Frakklands, Gallimard, en kemur síðan út í hverju landinu á fætur öðru, alls um 40 löndum. Hún er væntanleg á íslensku hjá JPV útgáfu í haust. Friðrik Rafnsson vinnur að þýðingu bókarinnar um þessar mundir og mun í rabbinu segja frá henni og fara yfir helstu atriðin í höfundarferli Kundera, en hann verður áttræður þann 1. apríl n.k. Fyrirlesturinn verður á íslensku, en útdráttur verður á frönsku. Einnig verða sýndir 3 stuttir bútar úr sjónvarpsviðtölum frá ýmsum tímum.

Heimildamyndir um Yves Saint-Laurent og tímaritið Elle - Norræni tískutvíæringurinn. Alliance Française er það mikil ánægja að vera þátttakendur í fyrstu hátíð Norræna tískutvíæringsins og bjóðum við ykkur af því tilefni að sjá tvær heimildamyndir sunnudaginn 22. mars kl. 17 og kl. 20 í Norræna húsinu, Sturlugötu 5, 101 Reykjavík: Kl. 17, "Yves Saint-Laurent, 5 avenue Marceau 75116 Paris", eftir David Teboul, 2002, 85 mín: fylgst er með því þegar hátískan verður til, allt frá fyrstu rissu til tískusýningar. David Teboul, leikstjóri myndarinnar, fer með okkur baksviðs hjá tískurisanum, sem samþykkir í fyrsta sinn að opna dyr tískuhúss síns fyrir kvikmyndafólki. Kl. 20, "Og Elle skapaði konuna" eftir David Teboul ; 2006, 84 mín: Það þekkja allir tískutímaritið Elle. Þetta alþjóðlega tímarit kom fyrst út í Frakklandi árið 1945, en þessi heimildamynd fjallar um sögu tímaritsins, hlutverk þess í kvenréttindabaráttu frá því á 7. áratugnum og stöðug áhrif þess á sögu tískunnar.

Vika franskrar tungu: morgudagurinn - frönskustrætó fer í grunnskólana, opið hús í Alliance française, ljósmyndasýning “Myndir morgundagsins” og ljóðakeppnin “Allons en France” Í marsmánuði ár hvert er haldin alþjóðleg vika franskrar tungu. Tilgangurinn með henni er að minna á að franska er móðurmál 200 milljóna manna um heim allan og sameina 870 milljónir íbúa og ríkisstjórna þeirra 70 landa sem eru í Alþjóðasamtökum frönskumælandi landa (Organisation internationale de la Francophonie). Alliance Française í Reykjavík tekur þátt í þessum alþjóðlegu hátíðahöldum dagana 16. til 21. mars. Þemað í ár er “Morgundagurinn”. Að auki voru þessi 10 orð valin, til að leika sér með þetta þema: Annars staðar, fangari, jarðskin, smellur, samræmanlegt, þrá, genamengi, varanlegt, umbreyta, sýn (http://www.semainelf.culture.fr/). Alliance Française tekur þátt í þessum alþjóðlega fagnaði og fer á fund barnanna, fullorðna fólk morgundagsins til að uppgötva frönsku. 1. Þriðjudaginn 17. mars til fimmtudagsins 19. mars, frönskustrætó fer í nokkra grunnskóla í Reykjavík til fundar við yngstu nemendurna: Allir muna eftir Risessunni og pabba hennar sem lögðu Reykjavík undir sig fyrir fáum árum, ungum sem öldnum til undrunar og ánægju. Risessan talaði frönsku, tungumál sem fæstir ungir krakkar tala, en nú er hægt að bæta úr því. Þrjá morgna fara þrír frönskukennarar Alliance Française á stúfana til að hitta íslenska æsku, nemendur 2., 3. og 4. bekkjar í nokkrum grunnskólum í Reykjavík og kynna fyrir þeim frönsku í gegnum leik og smáverkefni. Þriðjudaginn 17. mars fer strætóinn í Norðlingaskóla og Víkurskóla; þann 18. verður hann við Melaskóla og fimmtudaginn 19. við Landakotsskóla og Hlíðaskóla. 2. Opið hús föstudaginn 20. mars: Frá kl. 10 til 18 verður opið hús í Alliance Française fyrir alla þá sem hafa hug á að kynna sér franska tungu og menningu. Menntaskólanemar sem læra frönsku eru velkomnir, og gefst þeim tækifæri til að sjá ljósmyndasýninguna og vinna verkefni um orðin 10. Með þátttöku Sendiráðs Kanada. 3. Föstudaginn 20. mars, kl. 18-20, opnun ljósmyndasýningarinnar “MORGUNDAGURINN Í MYNDUM”: Ljósmyndasýning Fókuss, félags áhugaljosmyndara (www.fokusfelag.is/index.php) "MORGUNDAGURINN Í MYNDUM" verður sýnd í húsakynnum Alliance Française, Tryggvagötu 8, Reykjavík frá 20 mars til 11. apríl Sýningin er haldin í tilefni af alþjóðlegri viku franskrar tungu, og eru myndirnar allar í tengslum við eitt af þeim 10 orðum, sem Menningarráðuneyti Frakklands lagði til fyrir þessa viku. Félagar Fókus völdu fyrir þessa sýningu yfir 200 ljósmyndir, sem verða sýndar á tölvuskjám. Fókusfélagar nálgast hér sýningarformið á nýstárlegan hátt; með tæknina að vopni er boðið upp á þennan mikla fjölda mynda, þar sem ljósmyndarar nálgast viðfangsefnið á mjög mismunandi og áhugaverðan hátt. Sýningin er styrkt af EJS ehf. (http://www.ejs.is/), en þeir leggja til tölvur og skjái. 4. Laugardaginn 21. mars, frá kl. 13 til 15 í Borgarbókasafni Reykjavíkur, Tryggvagötu 15, Frönsk ljóðasamkeppni: “Allons en France“. Félag frönskukennara á Íslandi og Sendiráð Frakklands standa fyrir ljóðasamkeppninni “Allons en France”. Þessi samkeppni er ætluð öllum menntaskólanemum og fer þannig fram að þátttakendur skrifa og lesa síðan upp texta um borg og borgarlíf. Vinningshafinn fær vikuferð til Frakklands í sumar að launum!

febrúar 2009

Vetrarhátíð í Alliance Française : Ljósin í myrkrinu. Hugleikur Dagsson og Amanda Riffo í Alliance Française, Tryggvagötu 8, 101 Reykjavík Sýning frá 13. til 28. febrúar. Í tilefni af Vetrarhátíð í Reykjavík, býður Alliance Française upp á 2 sýningar : « Dark Alliance» eftir Hugleik Dagsson og « Hanabi » eftir Amanda Riffo. H. Dagsson, Sans titre, 2009 Amanda Riffo, Hanabi, 2005 Í tvær vikur í febrúar umbreytist Alliance Française í dimman helli, þar sem áður óútgefnar teikningar eftir Hugleik Dagsson verða til sýnis, afhent verða vasaljós til að lýsa upp og skoða teikningarnar. Hefur þú einhvern tímann séð svarta flugelda ? Amanda Riffo, ung frönsk listakona, sem er núna að vinna að list sinni á Íslandi, sýnir svarta flugelda. Það verða með öðrum orðum 2 sýningar til að njóta ljósanna í myrkrinu. Aldrei þessu vant verður Alliance Française opið föstudagskvöldið 13. febrúar frá kl. 19 til miðnættis með þátttöku í Safnanótt. Frekari upplýsingar er að finna á heimasíðu Vetrarhátíðar í Reykjavíkhttp://www.vetrarhatid.is/desktopdefault.aspx/tabid-2813 Komið í Alliance föstudagsvöldið 13. febrúar og vinnið helgarferð til Óslóar með því að taka þátt í skemmtilegum leik sem Reykjavíkurborg býður upp á, sjá : http://www.vetrarhatid.is/PortalData/11/Resources/safnanott_anskaeraA5_2.pdf Fyrir þá sem vilja frekari upplýsingar um listamennina, þá eru þetta heimasíður þeirra : Amanda Riffo : Á frönsku,, http://www.schirman-debeauce.com/index.php?id=109&L=0 Á ensku, http://www.schirman-debeauce.com/index.php?id=109&L=1 Hugleikur Dagsson : http://www.myspace.com/hugleikur http://www.dagsson.com/ http://fr-fr.facebook.com/pages/Hugleikur-Dagsson/13583104825

janúar 2009

Frönsk kvikmyndahátíð Alliance Française í Reykjavík, Sendiráð Frakklands á Íslandi og Græna ljósið kynna franska kvikmyndahátíð, sem verður haldin í 9. sinn dagana 16. til 29. janúar í Háskólabíói. Á dagskránni eru 10 kvikmyndir: 8 franskar myndir en í ár eru einnig 2 myndir sem ekki eru franskar, en eru á frönsku: önnur belgísk og hin kanadísk. Þessar myndir sýna vel fjölbreytni franskrar kvikmyndagerðar. Hr. Olivier Mauvisseau, sendiherra Frakklands á Íslandi og Hr. Friðrik Rafnsson, forseti Alliance Française í Reykjavík opna kvikmyndahátíðina við sýningu á myndinni “Skólabekkurinn” sem Laurent Cantet leikstýrir, þann 15. janúar kl. 20.00 (eingöngu fyrir boðsgesti): þessi mynd hlaut Gullpálmann 2008 á kvikmyndahátíðinni í Cannes, hún fékk mjög mikið lof dómnefndar og áhorfenda. Myndin sýnir mjög frumlegt sjónarhorn á skólastarfið. Sérstök sýning “spurningar/svör” verður haldin mánudaginn 19. janúar kl. 17.30 fyrir menntaskólanema og kennara. Eins og fyrr segir, er bryddað upp á þeirri nýjung í ár, að nú eru ekki aðeins franskar myndir á dagskránni, þar eru líka kanadíska kvikmyndin “C.R.A.Z.Y” og frá Belgíu kemur “Niðdimm nótt”. Sérstakar sýningar verða á þessum myndum föstudagskvöldið 16. janúar: “C.R.A.Z.Y” kl. 20.00 (eingöngu fyrir boðsgesti), Frú Anna Blauveldt, sendiherra Kanada verður viðstödd og á miðnætti verður sérstök miðnætursýning á hinni töfrandi mynd Belgans Olivier Smolders, “Niðdimm nótt”. Annað atriði sem vert er að benda á, er að Luc Jacquet, leikstjóri myndanna “Refurinn og barnið” og “Ferðalag keisaramörgæsanna”, kemur til Íslands í tilefni af kvikmyndahátíðinni og verður viðstaddur sýningu myndarinnar laugardaginn 17. janúar kl. 20.00. Hann ætlar að skoða aðstæður á Íslandi fyrir næstu kvikmynd sína, en það kemur sterklega til greina að hún verði tekin hér á landi. Ekki missa af þessu einstaka tækifæri! Lýsing á myndum hátíðarinnar er hér Dagskrá hátíðarinnar er hér Miðaverð til félagsmanna í Alliance Française (sýnið félagsskírteinið) og frönskunema er 500 kr.

desember 2008

“Opin bók” Bókmenntakvöld: Til heiðurs Jean-Marie Gustave le Clézio, Þriðjudaginn 9. desember 2009, kl. 20.00, Til heiðurs Jean-Marie Gustave le Clézio, bókmenntaverðlaunahafa Nóbels 2009 Miðvikudaginn 10. desember tekur Jean-Marie Gustave le Clézio á móti bókmenntaverðlaunum Nóbels í Stokkhólmi. Alliance Française í Reykjavík ætlar að heiðra þennan mikla rithöfund franskra bókmennta og býður ykkur að kynnast verkum hans. Á dagskránni: heimildamynd um rithöfundinn, sem er dregin úr seríunni “Rithöfundar í eina öld” (lengd: 45 mín); Torfi Tulinius, prófessor við Háskóla Íslands kynnir “Viðlag svengdarinnar” (“Ritournelle de la faim”), sem var gefin út í haust, og upplestur valdra kafla á frönsku. Þetta er einstakt tækifæri til að kynnast verkum eins af þekktustu samtímarithöfundum í frönsku bókmenntum. Bókmenntakvöldið fer fram á íslensku og frönsku. Aðgangur er ókeypis og allir eru velkomnir meðan húsrúm leyfir

Jólamatur og tónleikar Alliance Française, laugardaginn 6. desember kl. 19.30 Tími jólahlaðborðanna er kominn. Hið árlega fransk-íslenska jólahlaðborð Alliance Française verður haldið í húsnæði Alliance Française að Tryggvagötu 8 laugardaginn 6. desember klukkan 19.30. Á matseðlinum er nægtahorn fyllt með gæsalifur, húskarlahangikjöti, villigæsabringu, frönskum ostum, ávöxtum og makkarónukökum, o.s.frv., öllu rennt niður með frönskum vínum og undir ljúfum tónum kvartettsins Fagotterí, sem býður í lok kvölds upp á jólatónlist. Pantaðu strax í síma 552 38 70 frá kl. 14-18 eða með tölvupósti, alliance@af.is Verð : 3.800 kr (½ flaska af víni innifalin). Lengd tónleikanna er 30 mín. Greiðist um leið og pantað er, eða í síðasta lagi 6. desember, á bankareikning Alliance Française 0137-26-378, kt: 420169-1839. Með stuðningi franska sendiráðsins, sem við þökkum kærlega fyrir.

nóvember 2008

“Opin bók” Benoît Duteurtre í Alliance Française, þriðjudaginn 25. nóvember, kl. 20.00 Alliance Française efnir til bókmenntaklvölds sem tileinkað er franska rithöfundinumn Benoît Duteurtre í tilefni af útgáfu bókar hans "Litla stúlkan og sígarettan" sem nýverið kom út hjá bókaútgáfunni Skruddu í íslenskri þýðingu Friðriks Rafnssonar. Duteurtre er talinn einn af áhugaverðustu rithöfundum Frakka um þessar mundir, í senn hárfínn stílisti, hárbeittur húmoristi og þjóðfélagsrýnir. Þetta kvöld verður einkum helgað "Litlu stúlkunni og sígarettunni", en einnig verður dregin upp mynd af ferli Duteurtre og stöðu hans í frönskum samtímabókmenntum. Þetta er einstakt tækifæri til að hitta og hlusta á einn frumlegasta og vinsælasta rithöfund franskra samtímabókmennta, en bækur hans hafa verið þýddar á fjölmörg tungumál. Nánar um Litlu stúlkuna og sígarettuna: Lítil stúlka kemur að fertugum borgarstarfsmanni þar sem hann er að laumast til að reykja sígarettu inni á salerni í vinnunni. Hversdagslegt atvik sem þó er litið grafalvarlegum augum og hrindir af stað hryllilega fyndinni atburðarás sem sagnameistarar eins og Swift og Kafka hefðu verið fullsæmdir af. Þetta er listilega fléttuð, spennandi og bráðsmellin saga sem gerist í ímynduðu en kunnuglegu framtíðarsamfélagi. Undir sakleysislegu yfirborðinu veltir höfundur fyrir sér áleitnum spurningum um ýmis málefni, svo sem hvort börn eða fullorðnir eigi að ráða ferðinni í samfélaginu, hvort ást og manngæska séu tegundir í útrýmingarhættu, hvort fjölmiðlar eigi að leysa dómstóla af hólmi og hvort það sé minni glæpur að myrða lögreglumann en að reykja í laumi. Umsagnir: Það sem hrífur mig mest í Litlu stúlkunni og sígarettunni er hvernig sagan varpar ljósi á innbyggða heimsku nútíma samfélags; svartur húmor sem snýr hreinasta hryllingi upp í töfrandi dauðadans. - Milan Kundera ... háðsk ádeila á nútímasamfélagið ... pólitísk rétthugsun er allsráðandi en heilbrigð skynsemi og góðvild má sín lítils ... bráðskemmtileg bók og hressandi lesning í öllu því fári vondra bóka sem nú ríður yfir veröldina. - Jón Þ. Þór, DV Frábær bók, alveg frábær bók! - Kolbrún Bergþórsdóttir, Kiljunni ... skyldulesning nú á tímum vaxandi heimsku og sefjunar. Stórmerkileg lesning. - Bjarni Harðarson, Sunnlenska bókakaffið Bókmenntakvöldið fer fram á íslensku og frönsku. Aðgangur er ókeypis og allir eru velkomnir meðan húsrúm leyfir. Bókin verður seld á sérstöku tilboði af þessu tilefni og höfundur áritar hana fyrir þá sem þess óska.

Vínsmökkunarnámskeið Ferðast á nefinu um helstu vínhéruð Frakklands - vínsmökkunarnámskeið í Alliance Francaise þriðjudaginn 4. nóvember kl. 20:00 Sítróna, ristað brauð, múskat, hunang, trufflusveppur....vissuð þið að menn hafa fundið meira en þúsund lyktar- og bragðtegundir í vínum! Til að leiða áhugasama inn í veröld franskra eðalvína býður Alliance Française upp á vínsmökkunarnámskeið þriðjudaginn 4. nóvember kl. 20:00 undir leiðsögn Alexandre Martin, vínsmökkunarfræðings sem kennir við Ecole du Nez (Nefskólanum) í Paris, www.ecoledunez.fr Á námskeiðinu, sem stendur yfir í einn og hálfan klukkutíma er þátttakendum kennt að þekkja lyktar- og bragðtegundir ýmissa franskra eðalvína og í því skyni er beitt aðferðum sem eru sambland af kennslu og leik. Kennarinn, Alexandre Martin, notar safn sýnishorna af vínum sem Jean Lenoir hjá Nez du vin, http://www.lenezduvin.fr/54.html hefur sett saman og leiðsegir fólki í gegnum hinar ýmsum vínberjategundir og vínræktarhéruð Frakklands. Hér erum að ræða einstakt tækifæri til að fá innsýn í franska vínmenningu frá fyrstu hendi og læra þannig hversu mikil nautn það getur verið að smakka gott vín. Í lok námskeiðsins verðar tvær tegundir franskra vína smakkaðar og kynntar sérstaklega. Alexandre MARTIN fæddist árið 1972 í Pessac. Hann lærði vínrækt í Montpellier, vann seinna um skeið í Vínsafninu í París (Musée du Vin à Paris) og hefur átt þátt í að byggja upp og þróa vínkjallara munaðarverslunarinnar Fauchon. Árið 2005 bauð Jean Lenoir, heimsfrægur vínfræðingur, honum til samstarfs í vínskólanum Ecole du Nez og þar starfar hann nú. Námskeiðið verður haldið í Alliance francaise, Tryggvagötu 8, þriðjudaginn 4. nóvember kl. 20:00. Verð er 3900 kr. fyrir meðlimi Alliance, en 4900 kr. fyrir aðra. Námskeiðið verður haldið á frönsku og ensku. Skráning fer fram í síma 5523870 eða í alliance@af.is Alexandre Martin kemur hingað til lands með stuðningi franska sendiráðsins á Íslandi.

október 2008

Cyril de Pins: Bókmenntatímarit í Frakklandi nútímans. "Opin bók", bókmenntakvöld á vegum Alliance Française, miðvikudaginn 29 október kl, 18:00 Alliance Française hyggst í vetur að gangast fyrir bókmenntakvöldum sem bera yfirskriftina "Opin bók". Fyrsta kvöldið í þessari röð verður haldið miðvikudaginn 29. október kl. 18:00, en þá flytur Cyril de Pins fyrirlestur sem ber yfirskriftina: "Bókmenntatímarit í Frakklandi nútímans". Allt frá því á fyrri hluta 20. aldarinnar hafa mörg blómleg tímarit verið gefin út í Frakklandi og verið mikilvægur hluti menningar- og bókmenntalífsins þar. Hverngi er því varið nú? Mörg tímarit eru gefin út, stundum í fremur litlu upplagi, en þau eru engu að síður vettvangur fyrir ný verk og þar skiptast menn á skoðunum, oft hatrammlega, um bókmenntir, stjórnmál og siðferði. Hvaða mynd verður til af frönskum bókmenntum og hugsun þegar litið er yfir sviðið í tímaritaútgáfu í Frakklandi nú? Í fyrirlestrinum ætlar Cyril de Pins að leita svara við þessari spurningu og taka dæmi af nokkrum tímaritum máli sínu til stuðnings Sum þeirra eru rótgróin eins og Nouvelle Revue Française eða Europe, önnur nýrri eins og La Revue littéraire, l'Atelier du roman eða Ligne de risque. Cyril de Pins kennir heimspeki og vinnur að ritgerð í málvísindum um hugsunina í íslensku og okksídönsku á miðöldum. Hann skrifar oft sem gagnrýnandi í tímarit eins og www.boojum-mag.net og www.causeur.fr. Fyrirlesturinn verður haldinn miðvikudaginn 29. október kl. 18:00 í Alliance francaise, Tryggvagötu 8. Aðgangur er ókeypis og öllum heimill. Hann verður fluttur á frönsku og túlkaður á íslensku.

"Súkkulaði í allri sinni dýrð" Súkkulaðismökkunarnámskeið þriðjudaginn 14. október í Alliance Française, Tryggvagötu 8. Nýjustu rannsóknir á tilfinningalífi og heilastarfsemi okkar hafa leitt í ljós að neysla súkkulaðis veitir okkur svipaða vellíðunartilfinningu og ástin. Það er því eins með ástina og súkkulaðið, það þarf að vanda valið vel. Þetta er ekki öllum gefið, en hægt er að læra það og því býður Alliance francaise upp á eins kvölds námskeið þriðjudagskvöldið 14. október þar sem þátttakendur verða leiddir inn í undraheima súkkulaðisins. Farið verður yfir sögu súkkulaðis, hvað baunirnar heita hvaðan matreiðslumönnum heims. þær koma og hvernig súkkulaði er búið til. Þátttakendum verður boðið að smakka 8 tegundir af súkkulaði, þeim kennt að smakka súkkulaði og hvaða brögð við finnum í munninum. Á námskeiðinu verður smakkað hið franska Valrhona súkkulaði,www.valrhona.com, en það fyrirtæki var stofnað árið 1922. Valrhona er hráefni sem er viðurkennt og notað af bestu bökurum og súkkulaðigerðarmönnum og þeir leggja mikið upp úr að nýta möguleika súkkulaðisins á sem fjölbreyttastan hátt. Kennari er Viggó Vigfússon, kokkalandsliðsmaður og súkkulaðikonnessör. Kennt verður á íslensku. Lengd námskeiðsins er um 1 klst. og 15 mín. Verð: 3.900 (kr. 3.000 fyrir félagsmenn Alliance Française) ATH. Takmarkaður fjöldi. Skráning á námskeiðið á alliance@af.is eða í síma 552 3870. Einnig er hægt að skrá sig á skrifstofu l'Alliance Française, Tryggvagötu 8.

"Fjöltyngi í Evrópu" Þriðjudagskvöldið 7. október býður Alliance Française í Reykjavik öllu fag- og áhugafólki um tungumál til umræðukvölds um fjöltyngi. Í tilefni af evrópska tungumáladeginum 2008 þann 26. september var gríðarmikil ráðstefna haldin af Frökkum, sem nú eru í forsæti í Efnahagsbandalaginu, um tungumál og fjöltyngi. Ráðstefnan var haldin í hátíðarsal Sorbonneháskóla í París þar sem ýmsir af helstu ráðamönnum ESB ræddu stefnumótun í tungumálakennslu á næstu árum. Þrjú helstu málefnin til umræðu voru "Fjöltyngi og miðlun verka innan Evrópu", "Fjöltyngi, samkeppni í efnahagsmálum og félagsleg aðlögun" og "Sköpun og nýjungar í margtyngdri Evrópu." Meðal þeirra sem sóttu ráðstefnuna voru Einar Skúlason, framkvæmdastjóri Alþjóðahússins, Erna Árnadóttir frá Menntamálaráðuneytinu og Friðrik Rafnsson, þýðandi og forseti Alliance Française í Reykjavik. Þau munu fara yfir þær umræður sem fóru fram á ráðstefnunni og greina frá helstu niðurstöðum hennar. Kvöldið verður haldið í húsakynnum Alliance Française í Reykjavik, Tryggvagötu 8, þriðjudaginn 7. október og hefst kl. 20.00. Umræður fara fram á ensku, frönsku og íslensku. Allir eru velkomnir og aðgangur er ókeypis.

september 2008